मुंबई – एसबीआय पाठोपाठ बँक आॅफ बडोदामध्ये (बीओबी) थकीत कर्जात मोठा घोटाळा झाल्याची माहिती समोर आली आहे. बँक आॅफ बडोदा ५२५० कोटींची कर्जे ताळेबंदात दाखवताना घोळ झाल्याचे कबूल केले आहे. काही दिवसांपूर्वी ‘एसबीआय’मध्ये अशाच प्रकारे थकीत कर्जांचा घोळ समोर आला होता. बँक आॅफ बडोदाने ५ हजार २५० कोटीची थकीत कर्जे कमी दाखवण्यात आल्याचे शेअर बाजाराला कळवले आहे.
बँक आॅफ बडोदाने २०१८-२०१९ च्या आर्थिक वर्षात एकूण थकीत कर्जांपैकी सुमारे ४०९० हजार कोटींची तरतूद केली आहे. त्याशिवाय बँकेने १४७५ कोटींची तरतूद केली आहे. त्यामुळे २६१५ कोटींची थकीत कर्जे कुठे लेख परीक्षणातून कुठे गायब झाली किंवा कुठे वळवण्यात आली, असा प्रश्न निर्माण झाला आहे. रिझर्व्ह बँकेच्या थकीत कर्जांसंबधी नव्या नियमावलीनुसार काही हजार कोटींची थकीत कर्जे बँक ऑफ बडोदाच्या ताळेबंदातून गायब झाल्याचे निदर्शनात आले आहे.
या वर्षाच्या सुरूवातीला बँक आॅफ बडोदामध्ये विजया बँक आणि देना बँकेचे विलीनीकरण केले होते. रिझर्व्ह बँकेच्या तपासानुसार बँक आॅफ बडोदाने २०१८ च्या आर्थिक वर्षात मालमत्ता वर्गीकरणात तफावत असल्याचे आढळून आले आहे. रिझर्व्ह बँकेचा थकीत कर्जाबाबतचा अंदाज आणि बँक आॅफ बडोदाचे लेखा परीक्षण यात फरक दिसून आला आहे. ३१ मार्चअखेर बँक आॅफ बडोदाला ८३३९ कोटींचा तोटा झाला होता. त्यावेळी बँकेची थकीत कर्जे ७५१७४ कोटींवर होती. निव्वळ थकीत कर्जे २३७९५ कोटींवर होती. मात्र रिझर्व्ह बँकेच्या अंदाजानुसार निव्वळ थकीत कर्जे २९०४५ कोटी आहेत.
