जळगाव, (प्रतिनिधी) – येथील बस स्थानकावर लावण्यात येणारे फ्लेक्स / होर्डिंग यांची मुदत ३१ मार्च २०२० ला संपलेली असतांना संबंधित कंत्राटदार संस्थेला कोणतीही मुदतवाढ न देता फ्लेक्स, होर्डिंग्स लावण्यात येत असल्याचा धक्कादायक प्रकार माहिती अधिकारात आरटीआय प्रशिक्षक दीपक सपकाळे यांना मिळालेल्या माहितीत उघड झाली आहे.
याबाबत सविस्तर असे की,महाराष्ट्र राज्य मार्ग परिवहन मंडळ अंतर्गत येणारे जळगाव येथील बसस्थानक येथे उभारण्यात आलेले फ्लेक्स / होर्डिंग्ज आवाज विरहित जाहिरात होर्डिंग्ज, साईन बोर्ड, जाहिरात प्रदर्शित करण्यासाठी दिनांक 01/04/2017 ते 31/03/2020 या कालावधी करिता परवाना देण्यात आला होता.या कालावधीची मुदत संपायला तब्बल एक वर्षाचा कालावधी उलटला असतांना या ठिकाणी गेल्या वर्षभरात होर्डिंगवर जाहिरात करण्यात येत आहे.
ज्या संस्थेला या होर्डिंग्ज चे कंत्राट दिले होते त्या संस्थेचे काम संपल्यावर या ठिकाणी जाहिरात होत आहे हे येथील महाराष्ट्र राज्य मार्ग परिवहन मंडळाच्या अधिकाऱ्यांच्या लक्षात येत नाही का? असा प्रश्न निर्माण होत आहे. की एखाद्या जाहिरात एजन्सी समवेत हात मिळवणी करुन संबंधित अधिकारी महाराष्ट्र राज्य मार्ग परिवहन मंडळाचा महसूल बुडवून मलिदा लाटात आहे असा देखील आरोप होत आहे.
महाराष्ट्र राज्य मार्ग परिवहन मंडळाच्या अख्त्यारीत येणारे आपल्या कार्यालयाच्या दर्शनी भागावर करार संपूनही, मुदत संपूनही जाहिराती करिता होर्डिंग्ज लागत असल्याचं या अधिकारी मंडळीना दिसत नसावे का, दिसत असेल तर मग कानाडोळा का केला जात आहे यामुळे या प्रकरणात संशय निर्माण होत आहे.
गेल्या वर्षभरात या ठिकाणी जाहिरातीचे होर्डिंग ज्या अनधिकृत एजन्सीने लावले त्या एजन्सीकडून याचे दांडात्मक भाडे वसुल करुन कारवाई करण्याचे धाडस संबंधित विभागाचे अधिकारी करतील का हे पाहणे उत्सुकतेचे ठरणार आहे.
