जळगाव : राष्ट्रवादी काँग्रेस पक्षाचे नेते एकनाथ खडसे यांनी पुन्हा एकदा भाजप नेते गिरीश महाजन यांच्यावर निशाणा साधला आहे. महाजन हे नेहमी माझ्यावर मुख्यमंत्रिपदावरुन टीका करत असतात, मात्र मुख्यमंत्री पदाच्या शर्यतीत नाव येण्याइतपत योग्यता लायकी असली पाहिले, नुसत्या पोरी बायांच्या मागे फिरणाऱ्यांचे नाव मुख्यमंत्री पदाच्या शर्यतीत येत नाही. महाजनांचे आंदोलन म्हणजे नुसतीच नौटंकी असते, या शब्दात खडसेंनी महाजनांवर जोरदार शाब्दीक हल्ला चढविला आहे. ते मुक्ताईनगर येथील त्यांच्या निवासस्थानी पत्रकारांशी बोलत होते. यादरम्यान देवेंद्र फडणवीसांनाही त्यांनी आपल्या टीकेचे लक्ष केले.
गिरीश महाजन यांना सल्ला देताना खडसे पुढे म्हणाले की, डिझेल-पेट्रोल यांच्या किमती वाढत आहेत. दिवसेंदिवस महागाई वाढते आहे. याबाबत जर मोर्चा काढला असता तर बरं वाटलं असतं. महाजनांचे आंदोलन, उपोषण म्हणजे नौटंकी असते. मागच्या कालखंडामध्ये कापसाला सात हजार रुपये प्रतिक्विंटल भाव देऊ अस म्हणूनही त्यांनी नौटंकी केली.
ते सरकारमध्ये असतानाही इतका भाव मिळाला नाही. मंत्री असतानाही मिळाला नाही. आंदोलन करून नुसते नौटंकी करत राहायचे हे गिरीश महाजन यांचे नेहमीचेच आहे. त्याचपध्दतीने जळगावात भाजपचा नुकताच पार पडलेला महाआक्रोश मोर्चा हा नौटंकी आहे, अशा शब्दात खडसेंनी महाजनांना टोला लगावला.
