बुलढाणा : राज्यात बोर्डाच्या 10 वी आणि 12वी च्या परीक्षा सुरु असून या परीक्षा कॉपीमुक्त व्हावी यासाठी शिक्षण विभागाकडून अभियान राबविले जात आहे. त्यासाठी कडक नियमावली तयार करण्यात आली. मात्र या कॉपी मुक्त अभियानाचा फज्जा उडवला जात आहे.
त्याचेच एक उदाहरण बुलढाणा जिल्ह्यातून समोर आले आहे. बुलढाणा जिल्ह्यात बारावीच्या परीक्षेआधीच गणित विषयाचा पेपर फुटला आहे. सकाळी १० वाजेपासूनच हा पेपर सोशल मीडियावर व्हायरल होत आहे. त्यामुळे हा पेपर नेमका कुणी आणि कसा फोडला? असा प्रश्न उपस्थित होत आहे.
मिळालेल्या माहितीनुसार, आज बारावीचा गणिताचा पेपर होता. सिंदखेडराजा इथं एका परीक्षा केंद्रावर गणिताचा पेपर फुटला आहे. परीक्षा सुरू झाल्यानंतर हा पेपर व्हॉट्सअॅपवर व्हायरल करण्यात आला होता.
एवढ्या मोठ्या प्रमाणात हा सर्व प्रकार खुलेआम सुरू असताना परीक्षा केंद्रावरील शिक्षक नेमके काय करत आहे असा प्रश्न उपस्थित होत आहे दरम्यान, राज्यभरात ठिकठिकाणी परिक्षेमध्ये कॉपीचे सर्रास प्रकार सुरू आहे.
