मुंबई- राज्यात राष्ट्रपती राजवट लागू झाल्यानंतर माजी मुख्यमंत्री देवेंद्र फडणवीस यांना सरकारी निवासस्थान असलेला वर्षा बंगला रिकामा करायचा होता. मात्र, त्यांना आणखी तीन महिने या बंगल्यात वास्तव्य करता येणार आहे. त्यांना वाढीव मुदत देण्यात आल्याचं समजतं. सूत्रांच्या माहितीनुसार, फडणवीस यांनी यासाठी अर्ज केला होता आणि तो मंजूर करण्यात आला आहे.
राज्यात कोणताच पक्ष सत्ता स्थापन करू शकला नाही. त्यामुळं राज्यपाल भगतसिंह कोश्यारी यांनी राज्यात राष्ट्रपती राजवट लागू करण्याची शिफारस केली. त्यानंतर राष्ट्रपतींनी या शिफारशीच्या फाइलवर स्वाक्षरी केली. त्यामुळं आता राज्यात राष्ट्रपती राजवट लागू झाली आहे. काही माजी मंत्र्यांनी मलबारस्थित बंगले रिकामे करण्यासाठी अतिरिक्त वेळ मागितली आहे. तर मंत्रालयासमोरील बंगले रिकामे करण्याची काही मंत्र्यांनी तयारी सुरू केली आहे.
राज्यात राष्ट्रपती राजवट लागू झाली आहे. राष्ट्रपती राजवट लागू झाल्यानंतर सामान्य प्रशासन विभागानं एक परिपत्रक जारी करून सर्व मंत्र्यांना १३ नोव्हेंबरपर्यंत मंत्रालयातील कार्यालये रिकामी करण्याचे निर्देश दिले होते. त्यानंतर मंत्र्यांनी एका दिवसाच्या आतच मंत्रालयातील आपापली कार्यालये रिकामी केली.
सरकार स्थापन झाल्यानंतर काय?
माजी मुख्यमंत्री देवेंद्र फडणवीस यांना वर्षा बंगल्यात आणखी तीन महिने राहता येणार आहे. त्यांना वाढीव मुदत देण्यात आली आहे. दुसरीकडे, शिवसेना-काँग्रेस आणि राष्ट्रवादी हे तीन पक्ष राज्यात सरकार स्थापन करण्यासाठी प्रयत्नशील आहेत. ज्या पद्धतीनं त्यांचे सरकार स्थापनेसाठी प्रयत्न सुरू आहेत, ते पाहता नवं सरकार स्थापन होण्याची शक्यता अधिक आहे. जर तीन महिन्यांच्या आत राष्ट्रपती राजवट मागे घेण्यात आली आणि नवं सरकार स्थापन केलं गेलं तर काय होईल, असा प्रश्न उपस्थित होत आहे. जाणकारांच्या माहितीनुसार, अशा परिस्थितीत नव्या मुख्यमंत्र्यांसाठी फडणवीस यांना तात्काळ बंगला रिकामा करावा लागेल.
