धरणगाव : तालुक्यातील रोटवद गावाजवळ एक भीषण अपघात झाला आहे. या अपघातात एकाच कुटुंबातील बाप-लेक जागीचं ठार झाले असून पत्नी व मुलगा गंभीर जखमी झाले आहेत. दरम्यान, मुलगा आणि आईला उपचारासाठी रूग्णालयात दाखल करण्यात आले आहे.
काय आहे नेमकी घटना
प्रभाकर रघुनाथ सूर्यवंशी (वय ३५, रा. पिंपळगाव, ता. शिंदखेडा, जि.धुळे) हे पत्नी ममता सूर्यवंशी व दोन्ही मुले नायरा व मोहीत यांच्यासोबत धरणगावहून चोपडा चौफुली मार्गाने अमळनेरकडे दुचाकीने जात होते. वाटेत रोटवद गावाजवळ अंधारात बैलगाडी न दिसल्याने, त्यांची दुचाकी (एम.एच १८, एव्ही ५८११)बैलगाडीवर मागून आदळली.
या अपघातात प्रभाकर सूर्यवंशी व त्यांची मुलगी नायरा सूर्यवंशी (वय ७) या बाप लेकीचा जागीच मृत्यू झाला. तर त्यांच्या पत्नी ममता सूर्यवंशी व मुलगा मोहीत सूर्यवंशी हे जखमी झाले. जखमींना धरणगाव येथील ग्रामीण रुग्णालयात दाखल केले आहे.
