जालना । सध्या तरुणांमध्ये नैराश्यातून होणाऱ्या आत्महत्यांचे प्रमाण वाढत असल्याचे दिसून येत आहे. अशातच आपला जीव देण्यासाठी एक तरुण थेट रेल्वे ट्रॅकवर उभा राहिला. त्याचवेळी समोरून भरधाव वेगात ट्रेन येत होती. दरम्यान, लोको पायलटला रुळावर तरुण उभा असल्याचं दिसताच ट्रेन थांबविली. ही धक्कादायक घटना जालना शहरामधील आहे. हा संपूर्ण प्रकार परिसरातील एका व्यक्तीने आपल्या मोबाईल कॅमेऱ्यात कैद केला आहे. या घटनेचा व्हिडीओ सध्या व्हायरल होत आहे.
तरुण रेल्वे स्टेशनजवळ असलेल्या उड्डाण पुलाखाली आपला जीव देण्यासाठी थेट रेल्वे ट्रॅकवर उभा राहिला. त्याचवेळी समोरून भरधाव वेगात ट्रेन येत होती. दरम्यान, लोको पायलटला रुळावर तरुण उभा असल्याचं दिसताच त्याने दोन ते तीन वेळा हॉर्न वाजवले.
मात्र, तरी सुद्धा हा तरुण रेल्वे ट्रॅकवरून बाजूला होत नसल्याने अखेर लोको पायलटने ट्रेन थांबवली. ट्रेन थांबवताच या तरुणाने येऊ दे… येऊ दे… असं म्हणत आरडाओरड सुरू केली. बराच वेळ होऊन सुद्धा तरुण रुळावरून बाजूला होत नसल्याने कंटाळून लोको पायलट खाली उतरला.
