जळगाव ;- सध्या जळगाव ग्रामीण मतदार संघात चौरंगी लढत होण्याचे चित्र असून यामुळे या मतदार सांगतात ‘टफ फाईट ‘होणार आहे . त्यामुळे सहकार राज्यमंत्र्यांना पुन्हा निवडून येण्याचे आव्हान समोर राहणार आहे. जळगाव ग्रामीण मतदार संघ हा आळीपाळीने शिवसेना आणि राष्ट्रवादीचा मतदार संघ राहिला आहे. मागील पंचवार्षिक निवडणुकीत माजी मंत्री गुलाबराव देवकर यांनी सहकार राज्यमंत्री गुलाबराव पाटील यांचा पराभव केला होता . नंतरच्या निवडणुकीत गुलाबराव देवकरांचा गुलाबराव पाटील यांनी पराभव केला होता .
यानंतर गुलाबराव पाटलांना देखील मंत्रिपदाची संधी मिळाली होती. त्यांनी कोट्यवधींची विकासकामे केल्याचा दावा केला असून या विकासकामांच्या बळावर ते पुन्हा निवडणुकीला सामोरे जात असून त्यांचे कट्टर स्पर्धी गुलाबराव देवकर यांना घरकुल प्रकरणात शिक्षा सुनावण्यात आल्याने त्यांची रवानगी कारागृहात करण्यात आली होती . यामुळे गुलाबराव पाटील यांच्यासह त्यांच्या समर्थकांमध्ये कट्टर स्पर्धी यंदा राहणार नाही याची खात्री असल्याने त्यांना विजयाची शाशवती होती . मात्र ४ रोजी ऐनवेळी गुलाबराव देवकर यांचे चिरंजीव विशाल देवकर यांनी अपक्ष उमेदवारीचा अर्ज दाखल केल्याने आणि गुलाबराव देवकर यांना जामीन मिळाल्याने गुलाबराव पाटील समर्थकांची पायाखालची वाळू सरकली आहे. सध्या गुलाबराव देवकर हे निवडणूक लढवू शकत नसल्याने त्यांच्या चिरंजीवाचा प्रचार ते करू शकणार आहेत . त्यांनी मंत्रिपदाच्या कार्यकाळात केलेल्या कामांच्या जोरावर ते चिरंजीवांसाठी मतांचा जोगवा मागू शकणार आहे . जळगाव ग्रामीण मतदार संघात गुलाबराव देवकर यांना मोठ्या प्रमाणत मानणारा गट असल्याने विशाल देवकर हे गुलाबराव पाटलांना चांगलीच लढत देऊ शकणार आहेत . तर दुसरीकडे पुस्पा महाजन यांना राष्ट्रवादीने उमेदवारी जाहीर केली असून त्यांचे धरणगाव तालुक्यात प्रस्थ आहे . याशिवाय जळगाव बाजार समितीचे माजी सभापती लकी अण्णा टेलर उर्फ लक्ष्मण गंगाराम पाटील यांनी सभापतीपदाच्या कार्यकाळात जळगाव तालुक्यात भरीव कामे केली असून शेतकरी व्यापारी यांचाही त्यांना मोठा पाठिंबा आहे . लकी टेलर अपक्ष लढत देत असले तरी त्यांनी दोन वर्षांपासून मतदारसंघात वैयक्तिक भेटीगाठी वाढविल्या होत्या . त्यांनाही मोठा प्रतिसाद मिळत आहे . त्यामुळे विद्यमान आ. गुलाबराव पाटील यांच्यासमोर निवडून येण्याचे मोठे आव्हान असून चौरंगी लढतीचा कुणाला फायदा होऊन कोणता उमेदवार निवडून येतो याकडे सर्वांचे लक्ष लागले आहे.
