मुंबई – आज के शिवाजी-नरेंद्र मोदी या पुस्तकावर सर्व स्तरांतून चौफेर टीका होत असताना शिवसेनेचे नेते, खासदार संजय राऊत यांनी या प्रकरणी भारतीय जनता पक्षाला खडे बोल सुनावले आहेत. या पुस्तकाशी आपला संबंध नाही हे आज संध्याकाळपर्यंत भारतीय जनता पक्षाने स्पष्ट करावे, असे आवाहन संजय राऊत यांनी केले आहे. पंतप्रधान नरेंद्र मोदी यांची तुलना छत्रपती शिवाजी महाराज यांच्याशी करणे ही केवळ चमचेगिरी असल्याचा शाब्दिक प्रहार राऊत यांनी केला आहे. याची पंतप्रधान नरेंद्र मोदी यांना कल्पना नसावी, म्हणून त्यांना दोषी धरता येणार नाही, असेही राऊत यांनी आवर्जून म्हटले आहे.
पंतप्रधान नरेंद्र मोदी यांची तुलना छत्रपती शिवाजी महाराजांशी करणे हे महाराष्ट्र भाजपला मान्य आहे का, असा सवाल राऊत यांनी उपस्थित केला आहे. पंतप्रधान मोदी यांना कधी १३ वा अवतार ठरवले गेले, तर कधी छत्रपती शिवाजी महाराज यांच्याशी त्यांची तुलना केली गेली, याकडे लक्ष वेधत ही केवळ चमचेगिरी असल्याचे राऊत म्हणाले. भारतीय जनता पक्षाने हे पुस्तक त्वरीत मागे घ्यावे. तसेच आज संध्याकाळपर्यंत राज्य भाजपने या पुस्तकाबाबत आपले काय म्हणणे आहे हे स्पष्ट करावे, राज्यातील जनतेलाही ते जाणून घ्यायचे आहे, असे राऊत म्हणाले.
राज्याचे अन्न आणि नागरी पुरवठा मंत्री छगन भुजबळ यांनीही ‘आजके शिवाजी-नरेंद्र मोदी’ या पुस्तकावर टीकेची झोड उठवली आहे. छत्रपती शिवाजी महाराज यांच्याशी पंतप्रधान नरेंद्र मोदी यांची कधीही तुलना होऊ शकत नाही. पूर्वी आपली स्तुती करण्यासाठी राजे भाट ठेवत असत. हा त्यातीलच प्रकार आहे. नरेंद्र मोदी यांना कधी ‘हर-हर मोदी’ तर कधी ‘शिवशंभो; असे संबोधले जाते. या कडे लोकांनी दुर्लक्ष करून पाहिले. मात्र आता तर थेट त्यांची तुलना छत्रपती शिवाजी महाराजांशीच होऊ लागली आहे, असे म्हणत छत्रपती शिवाजी महाराज कुठे आणि हे कुठे, अशा शब्दात भुजबळ यांनी पंतप्रधान मोदी यांच्यावर टीकास्त्र सोडले आहे.
