नवी दिल्ली- आयएनएक्स मीडिया प्रकरणी माजी केंद्रीय अर्थ मंत्री आणि काँग्रेस नेते पी. चिदंबरम यांचा जामीन अर्ज दिल्ली हायकोर्टाने फेटाळला असून चिदंबरम यांना तूर्त कोठडीतच राहावे लागणार आहे. २१ ऑगस्ट रोजी चिदंबरम यांना दिल्लीतील त्यांच्या निवासस्थानातून नाट्यमयरित्या अटक करण्यात आली होती. तेव्हापासून ते कोठडीतच आहेत.
चिदंबरम यांनी ८ नोव्हेंबर रोजी हायकोर्टात जामिनासाठी अर्ज केला होता. या जामीन अर्जावर आज न्या. सुरेश कैट यांच्यापुढे सुनावणी झाली असता त्यांनी जामिनास नकार दिला. तपास सध्या प्रगतीपथावर असून आता जामीन दिल्यास त्याचा तपासावर परिणाम होऊ शकतो, असे नमूद करत हायकोर्टाने चिदंबरम यांचा जामीन अर्ज फेटाळून लावला. दरम्यान, दोनच दिवसांपूर्वी दिल्लीतील राउज एव्हेन्यू कोर्टाने चिदंबरम यांची २७ नोव्हेंबरपर्यंत न्यायालयीन कोठडीत रवानगी केली आहे. त्यानंतर आज पुन्हा एकदा चिदंबरम यांचा जामीन अर्ज फेटाळण्यात आल्याने त्यांना आणखी काही काळ कोठडीतच काढावा लागणार आहे. चिदंबरम यांना सध्या तिहार कारागृहात ठेवण्यात आले आहे.
२००७ मध्ये पी. चिदंबरम केंद्रीय अर्थमंत्री असताना अर्थमंत्रालयाच्या अखत्यारित असलेल्या परकीय गुंतवणूक प्रोत्साहन मंडळाने आयएनएक्स मीडियाला ३०५ कोटी रुपये इतका परकीय निधी स्वीकारण्यास मंजुरी दिली होती. या मंजुरी प्रक्रियेत अनियमितता आढळून आल्याने त्या आधारावर १५ मे २०१७ रोजी सीबीआयने याप्रकरणी गुन्हा दाखल केला होता. त्यानंतर २१ ऑगस्ट रोजी चिदंबरम यांना दिल्लीतील जोरबाग येथील निवासस्थानातून सीबीआयच्या पथकाने नाट्यमयरित्या अटक केली होती. त्यानंतर चिदंबरम कोठडीतच आहेत. आधी सीबीआय कोठडी, नंतर ईडी कोठडी आणि आता चिदंबरम न्यायालयीन कोठडीत आहेत. सध्या ते तिहार कारागृहात आहेत. चिदंबरम यांना प्रकृती बिघडल्याने २८ ऑक्टोबर रोजी एम्समध्ये दाखल करण्यात आले होते. त्यांच्यावर उपचार केल्यानंतर तासाभराने त्यांना डिस्चार्ज देण्यात आला होता.
