पनवेल : नात्याला काळिमा फासणारी एक धक्कादायक घटना समोर आलीय. एका ६२ वर्षीय वृद्धाने आपल्या साडेचार वर्षीय नातीवर लैंगिक अत्याचार केला. ही घटना पनवेलमध्ये घडली असून या घटनेने मोठी खळबळ उडाली आहे. दरम्यान, याप्रकरणी पनवेल तालुका पोलिसांनी नराधम आजोबावर लैंगिक अत्याचार व पॉक्सो कायद्याखाली गुन्हा दाखल करून १५ दिवस उलटून गेले आहेत. मात्र पोलिसांनी अद्याप आरोपीला अटक केलेली नाही. त्यामुळे पीडित बालिकेच्या कुटुंबीयांनी नाराजी व्यक्त केली आहे.
काय आहे घटना?
या घटनेतील ६२ वर्षीय आरोपी पनवेलमध्ये पत्नीसह राहतो. त्याला साडेचार वर्षांची नात आहे. आरोपी हा दर शनिवार-रविवारी पनवेल तालुक्यातील आपल्या मूळ गावी पत्नी व नातीसोबत जात असे. याच दरम्यान हा नराधम आजोबाने संधी साधून आपल्या नातीसोबत अश्लील व लैंगिक कृत्य केले. प्रथम त्याने ऑगस्ट २०२०मध्ये, त्यानंतर फेब्रुवारी २०२१ मध्ये आपल्या नातीवर अत्याचार केला. पीडित बालिकेला लघुशंका करण्यास त्रास झाल्याने तिने आजोबांनी लैंगिक अत्याचार केल्याची माहिती आपल्या आईला दिली होती. मुलीच्या आईने याची माहिती आपल्या पतीला दिली होती. मात्र आपल्या वडिलांवर खोटा आळ घेत असल्याचे सांगत पीडित मुलीच्या वडिलांनी पत्नीला दोन्ही वेळेस गप्प केले होते.
गेल्या महिन्यातही पीडित मुलीसोबत पुन्हा तसाच प्रकार घडल्यानंतर, मुलीच्या आईने याबाबतची माहिती पुन्हा आपल्या पतीला दिली. मात्र याही वेळी पतीने आपल्या वडिलांची बाजू घेत पत्नीला गप्प केले. त्यामुळे पीडित मुलीच्या आईने मुलीसह आपल्या भावाचे घर गाठून त्याला या प्रकारची माहिती दिली आणि त्यानंतर ३० सप्टेंबर रोजी पनवेल तालुका पोलिस ठाण्यात आपल्या सासऱ्याविरोधात तक्रार दाखल केली. त्यानुसार पोलिसांनी साडेचार वर्षीय नातीवर लैंगिक अत्याचार करणाऱ्या आजोबाविरोधात लैंगिक अत्याचार व पॉक्सो कायद्याखाली गुन्हा दाखल केला.
गुन्हा दाखल होऊन १५ दिवस उलटले, तरी पोलिसांनी आरोपी आजोबाला अटक केलेली नाही. याबाबत पनवेल तालुका पोलिस ठाण्याचे वरिष्ठ पोलिस निरीक्षक रवींद्र दौंडकर यांच्याशी संपर्क साधला असता, त्यांनी आरोपीचा शोध घेण्यात येत असल्याचे सांगितले.
