मुंबई- शिवसेनेच्या ज्येष्ठ नगरसेविका किशोरी पेडणेकर यांना मुंबईच्या नव्या महापौर होणार आहेत. शिवसेनेकडून त्यांनी महापौरपदाच्या उमेदवार म्हणून आज अर्ज भरला आहे. पेडणेकर या पालिकेतील ज्येष्ठ नगरसेविका असून त्यांनी पालिकेच्या विविध पदांवर काम केलं आहे. आक्रमक नगरसेविका म्हणूनही त्या प्रसिद्ध आहेत.
येत्या ९ मार्च रोजी महापौरपदाची निवडणूक होणार आहे. मुंबईचं महापौरपद खुल्यावर्गासाठी राखीव झाल्याने या पदासाठी शिवसेनेतील अनेक नगरसेवकांनी लॉबिंग सुरू केली होती. काही नगरसेवकांनी पक्षातील वरिष्ठ नेत्यांशी संपर्क साधून त्यांची सेटिंग लावण्याचेही प्रयत्न केले होते. मंगेश सातमकर, रमाकांत रहाटे, यशवंत जाधव आदी नगरसेवकांनी महापौरपदासाठी फिल्डिंग लावली असली तरी या सर्वांवर किशोरी पेडणेकर यांनी मात केली आहे. पालिकेत महापौरांच्या दालनात सचिव अनिल परब यांची महापौर आणि सेना नगरसेवकांसोबत बैठक झाली. त्यात पेडणेकर यांच्या नावावर शिक्कामोर्तब करण्यात आलं. आज सकाळी शिवसेना पक्षप्रमुख उद्धव ठाकरे यांनी स्थायी समिती अध्यक्ष यशवंत जाधव यांना मातोश्रीवर बोलावून पेडणेकर यांना महापौरपद देण्यात येत असल्याचं सांगितलं होतं, असंही सूत्रांनी सांगितलं.
आदित्यसाठी घेतलेल्या मेहनतीची बक्षीसी?
शिवसेनेचे नेते आदित्य ठाकरे हे वरळी विधानसभा मतदारसंघातून निवडून आले आहेत. पेडणेकर या आदित्यच्या मतदारसंघातील नगरसेविका आहेत. विधानसभा निवडणुकीत त्यांनी आदित्य यांच्यासाठी प्रचंड मेहनत घेतली होती. महिलांना एकत्रित करण्यापासून ते पदयात्रा आणि डोअर-टू-डोअर संपर्क करून त्यांनी मतदारांना मतदान केंद्रापर्यंत खेचून आणले होते. त्यामुळे त्यांच्या मेहनतीचं फळ म्हणून त्यांना महापौरपद देण्यात येणार असल्याचं सांगण्यात येतं.
