माय एफएम चॅनेल व एलआयसी द्वारा आयोजित सिझन-09 “जियो दिल से अवॉर्डस- 2021” चे आज औरंगाबाद येथे माय एफएम चॅनेल च्या मुख्य कार्यालयात कोरोना कोविड- 19 चे सर्व नियम पाळत वितरण करण्यात आले. या अवॉर्डस साठी महाराष्ट्र, गुजरात, मध्यप्रदेश, छत्तीसगड, राजस्थान, पंजाब व हरयाणा या सर्व राज्यातून अनेक आदर्श व्यक्तींना वेगवेगळ्या विभागातून पुरस्कारासाठी नामांकन मिळाले होते. त्यात सामाजिक सेवा विभाग, शिक्षण विभाग, महिला सक्षमीकरण विभाग, ऑनलाइन शिक्षण विभाग, मानव विकास विभाग, जनसेवा विभाग सारखे अनेक विभागातून काही व्यक्तींची नामांकनासाठी निवड करण्यात आली होती. त्यानंतर संपूर्ण भारतभर व या सर्व 07 राज्यात ऑनलाइन वोटिंग साठी आव्हान करण्यात आले होते. ऑनलाइन वोटिंग नंतर 16 मार्च, 2021 रोजी सर्व राज्यातून ऑनलाईन वोटिंग द्वारे विजेत्या ठरलेल्या सर्व जियो दिल से अवॉर्डस विजेत्यांच्या नावांची घोषणा करण्यात आली होती.
या सर्व विजेत्यांमध्ये आपल्या महाराष्ट्र राज्यातून एकूण वेगवेगळ्या विभागात 05 जण विजेते ठरलेत. त्यात आपल्या जळगांव जिल्ह्यातून रावेर तालुक्यात जिल्हा परिषद प्राथमिक शाळा, पुनखेडे येथे प्राथमिक शिक्षक म्हणून कार्यरत असलेले उपक्रमशील शिक्षक व गुलाबी गांव संकल्पनेचे प्रणेते जितेंद्र गवळी यांनी कोरोना कोविड-19 च्या कालावधीत लहान खेड्या पाड्यातील व आदिवासी भागातील सर्व गरजू विद्यार्थ्यांपर्यंत आपल्या टीम च्या झेड पी लाईव्ह एज्युकेशन या अँप द्वारे घरोघरी प्रत्येक विद्यार्थ्यांपर्यंत ऑनलाइन शिक्षण पोहोचविले. त्यासोबतच संपूर्ण महाराष्ट्रात त्यांच्या टीम च्या या ऑनलाइन शिक्षण कार्याचा लाभ झाल्याचे दिसले. त्यामुळे शिक्षण व ऑनलाइन शिक्षण विभागात सर्व राज्यातून एकमेव विजेता म्हणून त्यांची निवड झालेली आहे.
जळगांव जिल्हा व रावेर तालुकासाठी ही अभिमानाची बाब आहे. औरंगाबाद येथील माय एफएम च्या मुख्य कार्यालयात आज जितेंद्र गवळी यांना “जियो दिल से अवॉर्डस-2021” चा विजेता म्हणून दिव्य मराठी चे राज्य मुख संपादक संजय आवटे व सुप्रसिद्ध कवी गीतकार दासू वैद्य यांच्या हस्ते पुष्पगुच्छ, प्रमाणपत्र व स्मृतिचिन्ह देवून त्यांना गौरविण्यात आलेले आहे. त्यांच्या या निवडीबद्दल अनेक अधिकारी व पदाधिकारी आणि शिक्षकांनी त्यांचे अभिनंदन केलेले आहे.
