जळगाव,(प्रतिनिधी)- राज्यासह जळगाव जिल्ह्यात वाळूच्या अनेक तक्रारी असतांना जळगाव जिल्ह्यातून एक मोठी घटना समोर आली आहे, जळगावच्या जवळच असलेल्या नशिराबादजवळ रात्री ११ वाजेच्या सुमारास वाळूमाफियांनी उपजिल्हाधिकारी यांच्या पथकावर केलेला हल्ल्यात उपजिल्हाधिकारी जखमी झाले असून त्यांच्या शासकीय वाहनाची तोडफोड देखील झाली आहे या प्रकरणी एक संशयित पोलिसांनी ताब्यात घेतला आहे.
या बाबत प्राप्त माहितीनुसार जळगाव जवळच असलेल्या तरसोद फाटा ते नशिराबाद दरम्यान मंगळवार, ६ रोजी रात्री ११ च्या सुमारास निवासी उपजिल्हाधिकारी सोपान रामनाथ कासार यांच्या पथकावर ७ ते ८ वाळूमाफियांनी जीवघेणा हल्ला करत लोखंडी रॉडने मारहाण केल्याने सोपान कासार गंभीर जखमी झाले असून उपचारासाठी शासकीय वैद्यकीय महाविद्यालय व रुग्णालयात दाखल करण्यात आले आहे. या ठिकाणी रात्रीच जिल्हाधिकारी आयुष प्रसाद, पोलिस अधीक्षक एमसीव्ही महेश्वर रेड्डी यांनी भेट देऊन त्यांची विचारपूस केली.
मंगळवारी रात्री अवैध वाळू वाहतुकीविरुद्ध कारवाई करण्यासाठी निवासी उपजिल्हाधिकारी सोपान कासार, तहसीलदार विजय बनसोडे हे अन्य दोन जणांसह शासकीय वाहनाने (क्र. एम एच २८, सी ६४२१) गेले होते. त्यांना अवैध वाळू वाहतूक करणारे दोन डंपर दिसले.यापैकी एक डंपर न थांबता पुढे गेल्याने त्याचा पाठलाग करून त्याला जळगावच्या दिशेने परत आणण्यात आले. उपजिल्हाधिकारी सोपान कासार हे शासकीय वाहनात बसलेले असताना सात ते आठ जण त्यांच्या दिशेने आले व थेट त्यांनी कासार यांच्यावर हल्ला केला. यात त्यांच्या डोक्यावर लोखंडी रॉड मारल्याने जखम होऊन मोठ्या प्रमाणात रक्तस्त्राव झाला.
