मुंबई – दिल्लीतील बैठकांचं सत्रं संपल्यानंतर आता उद्या मुंबईत शिवसेना,काँग्रेस आणि राष्ट्रवादी महाआघाडीच्या बैठका होणार आहेत. उद्या दोन्ही काँग्रेसचे नेते शिवसेना नेत्यांशी चर्चा केल्यानंतर शिवसेना पक्षप्रमुख उद्धव ठाकरे यांची भेट घेणार आहेत. उद्याचा दिवस सत्तास्थापनेसाठी अत्यंत महत्त्वाचा असल्याने या भेटीकडे सर्वांचं लक्ष लागलं आहे.
गेल्या दोन दिवसांपासून दिल्लीत राष्ट्रवादी काँग्रेसचे अध्यक्ष शरद पवार यांच्या निवासस्थी दोन्ही काँग्रेसच्या नेत्यांच्या बैठका झाल्या. आज या बैठका संपल्या असून दोन्ही काँग्रेसचे नेते मुंबईकडे यायला निघाले आहेत. मुंबईत आल्यावर दोन्ही काँग्रेसच्या नेत्यांची शिवसेना नेत्यांसोबत बैठक होणार आहे. त्यानंतर दोन्ही काँग्रेसचे नेते शिवसेना पक्षप्रमुख उद्धव ठाकरे यांची उद्या सायंकाळी भेट घेतील. त्यानंतर संयुक्त पत्रकार परिषद घेऊन नव्या आघाडीची घोषणा करण्याची शक्यता असल्याचं वर्तवण्यात येत आहे. उद्धव ठाकरे यांच्याशी काँग्रेस नेत्यांची भेट मातोश्रीवर होणार की पंचतारांकीत हॉटेलमध्ये ही भेट होणार, याबाबतची माहिती देण्यात आलेली नाही. दरम्यान, तिन्ही पक्षाच्या होणाऱ्या बैठकीकडे आणि उद्धव ठाकरेंशी काँग्रेस नेत्यांच्या होणाऱ्या चर्चेकडे संपूर्ण महाराष्ट्राचे लक्ष लागले आहे.
उद्या शुक्रवारीच शिवसेना पक्षप्रमुख उद्धव ठाकरे यांच्या मातोश्री निवासस्थानी शिवसेना आमदारांची बैठक होणार आहे. उद्या दुपारी १२ वाजता ही बैठक होणार होती. परंतु, काँग्रेस-राष्ट्रवादीचे नेते उद्धव यांच्याशी चर्चा करण्यासाठी संध्याकाळी येणार असल्याने शिवसेना आमदारांची बैठक उद्या सकाळी १० वाजता घेण्यात येणार आहे. या बैठकीत आमदारांना काही सूचना देण्यात येणार असून त्यांना मुंबई न सोडण्याचे आदेशही आमदारांना देण्यात येणार असल्याचं सूत्रांनी सांगितलं. या आमदारांना मुंबईतील हॉटेलमध्ये ठेवण्याचा बंदोबस्तही करण्यात आल्याचं सांगण्यात येतं. त्यामुळे उद्या मुंबईत होणाऱ्या राजकीय घडामोडींकडे संपूर्ण महाराष्ट्राचे लक्ष लागले आहे.
