अरबी समुद्रात कमी दाबाचा पट्टा निर्माण झाला असून ५ ते ७ जून दोन दिवस त्याचे रूपांतर चक्रीवादळात होण्याची शक्यता हवामान विभागाने वर्तवली आहे. दक्षिणपूर्व अरबी समुद्रात चक्रीवादळ निर्माण होण्याची शक्यता असल्याने व अरबी समुद्रात निर्माण झालेल्या कमी दाबाच्या क्षेत्रामुळे मुंबई आणि कोकण प्रदेशासह महाराष्ट्रात मुसळधार पाऊस (Heavy Rainfall) आणि अचानक पूर (Floods) येण्याची शक्यता वर्तविण्यात आली आहे.
राज्यात मान्सून दाखल होण्यासाठी अवघे काही दिवस बाकी आहेत. 7 जूनपर्यंत अरबी समुद्रात कमी दाबाचे क्षेत्र तयार होण्याची शक्यता IMD ने वर्तवली आहे. यामुळे चक्रीवादळ विकसित होण्याची शक्यता असून या चक्रीवादळ बिपरजॉय (Cyclone Biparjoy) असे नाव देण्यात आले आहे.
एप्रिल महिन्यात, IMD ने उत्तर हिंद महासागर, बंगालचा उपसागर आणि हिंदी महासागरावरील उष्णकटिबंधीय चक्रीवादळांच्या नावांची तपशीलवार यादी जारी केली. भारतासाठी चक्रीवादळांच्या नावांमध्ये गती, तेज, मुरासू, आग, व्योम, झार, नीर आणि घुरनी यांचा समावेश होता, तर चक्रीवादळ बिपरजॉयला त्याचे नाव बांगलादेशासाठी मिळाले आणि त्यात निसर्ग, अर्णब आणि उपकुल सारख्या काही इतर नावांचा समावेश आहे.
हे चक्रीवादळ गुजरातच्या दिशेने सारकण्याचा अंदाज काही खासगी संस्थांनी वर्तवला आहे. चक्रीवादळाच्या निर्मितीसाठी समुद्राच्या पृष्ठभागाचे तापमान २७ अंश सेल्सिअस असावे लागते. सध्या अरबी समुद्राचे तापमान ३१ अंश सेल्सिअसच्या आसपास असून ते चक्रीवादळास अनुकूल आहे.
