जळगाव : जिल्हा परिषदेच्या आरोग्य विभागातील निवृत्त परिचारिका स्नेहलता चुंबळे यांचा मृतदेह शोध सुरू असताना एकामागून एक पाच बेपत्ता मृतदेह हाती लागले. तापीच्या प्रचंड प्रवाहात सापडलेल्या या मृतदेहांपैकी दोन पुरुष, तर तीन स्त्रियांचे मृतदेह पोलिसांच्या हाती लागले आहेत.मात्र चुंबळेंच्या मृतदेहाचा शोध अद्याप लागलेला नाही.
मूळ जळगावातील रहिवासी आणि नुकत्याच नाशिक येथे मुलाकडे स्थायिक झालेल्या स्नेहलता चुंबळे या जिल्हा परिषद कर्मचारी गेल्या महिन्यात (२० ऑगस्ट) जळगावला आयोजित ग. स. सोसायटीच्या वार्षिक सर्वसाधारण सभेसाठी आल्या होत्या. त्यानंतर त्या बेपत्ता झाल्या होत्या. या प्रकरणाचा तपास करताना त्यांची हत्या झाल्याचे उघडकीस आले. ३० लाखांसाठी जिल्हा परिषद लिपिक संघटनेचे अध्यक्ष जिजाबराव पाटील व उपाध्यक्ष विजय निकम यांनी धावत्या कारमध्ये चुंबळे यांचा गळा आवळून खून केला. मृतदेह शिरपूरजवळील तापी नदीच्या पुलावरून फेकल्याचे दोघांनी सांगितले. तेव्हापासून स्नेहलता यांच्या मृतदेहाचा शोध सुरू आहे.
या शोधादरम्यान दोन पुरुषांचे व तीन महिलांचे मृतदेह आजवर सापडले. मात्र, चुंबळेंच्या मृतदेहाचा शोध लागलेला नसून, सारंगखेडा येथे सापडलेल्या एका मृतदेहाचे डीएनए सॅम्पल घेण्यात येणार असून, ते चुंबळे यांच्या कुटुंबीयांच्या डीएनएबरोबर जुळवणी (मॅच) करण्यासाठी शासकीय वैद्यकीय प्रयोगशाळेत पाठविले जातील अशी माहिती आहे.
