मुंबई : विद्यार्थी तसेच पालकांसाठी एक मोठी बातमी आहे. राज्यातील प्राथमिक, माध्यमिक, उच्च माध्यमिक शाळांना उन्हाळी सुट्ट्या जाहीर करण्यात आल्या असून याबाबत शिक्षण विभागाकडून नुकतेच परिपत्रक जारी करण्यात आले आहे. त्यानुसार राज्यातील शाळांना यंदा 2 मे ते 11 जूनपर्यंत उन्हाळ्याची सुट्टी असणार आहे. त्यानंतर पुन्हा 12 जूनपासून शाळा सुरू होईल. तर विदर्भात 26 जूनपर्यंत शाळांना सुट्टी जाहीर करण्यात आली आहे.
या पत्रकात दिलेल्या निर्देशानुसार शिक्षक आणि शिक्षकेतर कर्मचाऱ्यांना 2 मे पासून उन्हाळी सुट्टी लागू होणार आहे. 2 मे पासून सुरू झालेली उन्हाळी सुट्टी ही 11 जून पर्यंत असणार आहे. तर राज्यभरातील नवे शैक्षणिक वर्ष हे 12 जून पासून सुरू होणार आहे. विदर्भातील उन्हाळा लक्षात घेता त्या भागातील नवे शैक्षणिक वर्ष हे 26 जून पासून सुरू होणार आहे.
इयत्ता पहिली ते नववी आणि इयत्ता अकरावीच्या विद्यार्थ्यांचा निकाल शाळांना 30 एप्रिल रोजी किंवा त्यानंतर उन्हाळी सुट्टीच्या काळात जाहीर करता येणार आहे. शाळातून उन्हाळी किंवा दिवाळीची दीर्घ सुट्टी कमी करून नाताळ किंवा गणेशोत्सव दरम्यान समायोजन करण्याचे अधिकार शिक्षण अधिकाऱ्यांच्या परवानगीने देण्यात येणार आहे. याचबरोबर, शैक्षणिक वर्षातील एकूण सुट्ट्या या 76 पेक्षा अधिक होणार नाही याची दक्षता शिक्षण अधिकाऱ्यांनी द्यावी, असं सुद्धा परिपत्रकात म्हटलं आहे.
