पाचोरा : भाऊबीजेला आपल्या बहिणीला भेटण्यासाठी गेलेल्या पाचोरा येथील १७ वर्षीय मुलाचा चाळीसगाव तालुक्यातील वालझिरी येथील नदीपात्रात पाय घसरून पडल्याने पाण्यात बुडून मृत्यू झाला. राहुल सुरेश चौधरी (वय १७) असे त्या मुलाचे नाव आहे. अतिशय मनमिळाऊ व हसमुख स्वभावाच्या राहुल याच्या मृत्यूने शोककळा पसरली आहे.
पाचोरा शहरातील श्रीराम नगर, सिंधी काॅलनी, जामनेर रोड, पाचोरा येथील रहिवाशी राहुल सुरेश चौधरी हा मुलगा २७ ऑक्टोबर रोजी भाऊबीजेसाठी आपल्या बहिणीकडे गेला होता. बहिणीचे आशिर्वाद घेत मोठ्या उत्साहात भाऊबीज हा पवित्र सण साजरा करण्यात आला. दुपारी १२:३० वाजेच्या सुमारास राहुल हा वालझिरी (चाळीसगाव) येथे आयोजित नवसाच्या कार्यक्रमात सहभागी झाला. नदीपात्राजवळ हात पाय धुण्यासाठी गेला असता अचानक राहुल याचा पाय घसरून तो थेट खोल पाण्यात पडला.
त्याच्यासोबत असलेल्या मुलांनी परिवारातील सदस्यांना या घटनेबद्दल माहिती दिली. उपस्थितांच्या मदतीने राहुल यास पाण्यातून बाहेर काढण्यात आले व लागलीच चाळीसगाव येथील ग्रामीण रुग्णालयात दाखल केले असता वैद्यकीय अधिकारी यांनी राहुल यास मृत घोषित केले. कुटुंबीयांनी एकच हंबरडा फोडला. मयत राहुल चौधरी याच्या पाश्चात्य वृद्ध आई, बहिण, पाहुणे असा परिवार आहे. राहुल चौधरी याच्या घरची परिस्थिती अत्यंत गरिबीची आहे. अतिशय मनमिळाऊ व हसमुख स्वभावाच्या राहुल याच्या मृत्यूने शोककळा पसरली आहे.
