मुंबई : मुख्यमंत्री एकनाथ शिंदे यांच्या नेतृत्वाखाली झालेल्या बंडामुळे शिवसेनेत दोन गट पडले. शिंदे गटात प्रवेश करणाऱ्यांची संख्या दिवसेंदिवस वाढत असून अशातच आता मनसे आणि शिंदे गट एकत्र येणार असल्याची चर्चा रंगली आहे. त्यासाठीच मनसेच्या गोटात हालचालींना वेग आल्याची चर्चा आहे. आज मनसेची महत्त्वपूर्ण बैठक पार पडणार आहेत. या बैठकीत काय निर्णय होतो याकडे सर्वांचे लक्ष लागून आहे.
मुंबई महापालिकेच्या निवडणुका जसजशा जवळ येत आहेत तसतसं राजकीय घडामोडींना वेग येताना दिसत आहे.आधीच मनसे अध्यक्ष राज ठाकरे आणि भाजप नेते यांच्यातील जवळीक गेल्या काही दिवसांमध्ये वाढताना दिसत आहे. त्यामुळे आगामी मुंबई महापालिका निवडणुकीत मनसे-भाजप एकत्र येणार असल्याच्या चर्चा रंगल्या आहेत. मात्र अशातच मनसे आणि शिंदे गट एकत्र येणार असल्याची चर्चा रंगली आहे. त्यासाठीच मनसेच्या गोटात हालचालींना वेग आल्याची चर्चा आहे.
मनसे अध्यक्ष राज ठाकरे यांनी एक महत्त्वाची बैठक बोलावली आहे. मनसे नेते आणि सरचिटणीस यांच्यासोबत ठाकरे यांची बैठक होणार आहे. ही बैठक आज (12 सप्टेंबर) सकाळी दहा वाजता वांद्रे येथील एमआयजी क्लब येथे आयोजित करण्यात आली आहे. या बैठकीची बातमी समोर आल्यानंतर अनेकांना या बैठकीबाबत उत्सुकता वाढली आहे. या बैठकीत राज ठाकरे नेमकी काय सूचना करतात ते पाहणं महत्त्वाचं ठरणार आहे.
