कोल्हापूर : शिक्षकाच्या त्रासाला कंटाळून एका महाविद्यालयीन तरुणीने आत्महत्या केल्याची धक्कादायक माहिती समोर आली आहे. अर्जुनवाडा ता. कागल इथे ही घटना घडली असून आकांक्षा तानाजी सातवेकर (वय 19) असे मृत तरुणीचे नाव आहे. याबाबत मुरगूड पोलिसांनी अमित भीमराव कुंभार या शिक्षकाला आज अटक केली आहे.
नेमकं काय घडलं?
मिळालेली माहितीनुसार, अर्जुनवाडा येथील रहिवाशी पण मुगळी (ता. कागल) येथील एका शाळेमध्ये शिक्षक म्हणून कार्यरत असणारा अमित कुंभार हा आपल्या गावातील महाविद्यालयीन शिक्षण घेणाऱ्या आकांक्षाला सतत फोन करत असे.
गेल्या महिना दीड महिन्यापासून तो वेगवेगळे मेसेजेसही पाठवायचा. तु लग्नासाठी होकार दिलास तर, मी माझी बायको मुलांना सोडून तुझ्या बरोबर लग्न करण्यास तयार होईन. असे अनेक संदेश तो पाठवत होता.
या सर्व प्रकारामुळे 22 जानेवारी रोजी आकांक्षाने कंटाळून आपल्या राहत्या घरीच विष प्राशन केले. तिला उपचारासाठी कोल्हापूर (Kolhapur) येथील शासकीय रुग्णालयात दाखल केले. यादरम्यान, 27 जानेवारी रोजी आकांक्षाने, “मी अमित कुंभार यांच्या त्रासाला कंटाळून विष प्राशन केल्याचा जबाब वैद्यकीय अधिकारी आणि पोलीस अधिकारी यांच्या समोर दिला होता.” मात्र, उपचार सुरू असतानाच काल दुपारी तिचा मृत्यू झाला आहे.
