नवी दिल्ली : बंगालच्या उपसागरात तयार झालेले कमी दाबाचे क्षेत्र येत्या काही तासांत ‘जवाद’ चक्रीवादळाचे रूप धारण करेल. परिस्थितीचे गांभीर्य लक्षात घेऊन पूर्व किनारपट्टी रेल्वेने जावाद चक्रीवादळाच्या सतर्कतेच्या पार्श्वभूमीवर प्रवाशांच्या सुरक्षिततेच्या दृष्टीने ३ आणि ४ डिसेंबरसाठी ९५ गाड्या रद्द करण्याचा निर्णय घेतला आहे.
या रद्द झालेल्या गाड्यांमध्ये पुरुषोत्तम एक्स्प्रेस, निलांचल एक्स्प्रेस, पुरीहून नवी दिल्लीकडे जाणारी नंदनकानन एक्स्प्रेस आणि भुवनेश्वर ते दिल्लीदरम्यान धावणाऱ्या अप आणि डाऊन गाड्यांचा समावेश आहे. ६ डिसेंबर रोजी अलेप्पीहून ही ट्रेन रद्द होण्याची शक्यता आहे. यासह भुवनेश्वर नवी दिल्ली राजधानी एक्सप्रेस, पुरी आनंद विहार नंदनकानन एक्सप्रेस, पुरी आनंद विहार निलांचल एक्सप्रेस यासह इतर अनेक गाड्या ४ डिसेंबर रोजी रद्द करण्यात आल्या आहेत.
‘जवाद’ वादळाचा धोका लक्षात घेऊन ईस्ट कोस्ट रेल्वेने सध्या 95 गाड्या रद्द केल्या आहेत. चक्रीवादळाचा प्रभाव तीव्र झाल्यास आणखी काही गाड्या रद्द केल्या जाऊ शकतात.
अंदमान समुद्राजवळ उगम पावलेल्या चक्रीवादळाचा यावेळी बंगालच्या उपसागरावर तसेच अरबी समुद्र आणि हिंदी महासागरावर परिणाम होत आहे. अशा स्थितीत मुसळधार पावसाची शक्यता आहे. पावसामुळे रेल्वे रुळांवर पाणी साचण्याची शक्यता आहे. रेल्वे आणि इतर उपकरणांच्या सिग्नलिंग सेवेवर परिणाम होऊ शकतो. मुसळधार पावसामुळे विजेचे खांबही खराब होऊ शकतात. त्यामुळेच खबरदारी म्हणून रेल्वेने वादळग्रस्त रेल्वे मार्गांवर धावणाऱ्या गाड्या आधीच रद्द केल्या आहेत.
