भाजपवर नाराज असलेले विदर्भातील शेतकरी नेते किशोर तिवारी यांनी आज शिवसेनेत प्रवेश केला. त्या प्रसंगी बोलताना उद्धव यांनी भाजप-शिवसेना युतीबाबतच्या अनेक प्रश्नांना उत्तरं दिली. ‘नाणारचं जे काही व्हायचं आहे, ते आधीच झालेलं आहे. ‘आरे’बाबतची शिवसेनेची भूमिका लोकभावनेला धरूनच आहे. त्यामुळं युतीमध्ये गोंधळण्यासारखं काही नाही,’ असंही उद्धव म्हणाले.
सन्मानजनक जागा मिळाल्या तरच!
तत्पूर्वी, उद्धव यांनी शिवसेनेचे नेते व मंत्री यांच्याशी युतीच्या जागावाटपाच्या संदर्भात सुमारे तासभर चर्चा केली. ‘चर्चा अंतिम टप्प्यात आली आहे. युती होईल अशी परिस्थिती आहे. मात्र, सन्मानजनक जागा मिळाल्या तरच त्यावर शिक्कामोर्तब होईल,’ असं उद्धव यांनी या बैठकीत स्पष्ट केल्याचं सूत्रांकडून समजतं. त्यामुळं संभ्रम वाढला आहे.
शिवसेना-भाजपमध्ये १२६-१६२ जागांचा फॉर्मुला ठरला असून शिवसेना त्यावर समाधानी आहे, अशी चर्चा राजकीय वर्तुळात आहे. या चर्चेच्या पार्श्वभूमीवर उद्धव यांनी आजची बैठक बोलावली होती. पण शिवसेनेला हव्या असलेल्या सन्मानजनक जागा म्हणजे नेमक्या किती जागा, हे मात्र कळू शकलेलं नाही.
फॉर्मुला ठरलेला नाही: चंद्रकांत पाटील
‘युतीचा कुठलाही फॉर्म्युला अद्याप ठरलेला नाही. उद्धव ठाकरे व देवेंद्र फडणवीस याबाबत अंतिम निर्णय घेतील. ते जे सांगतील, तोच अंतिम फॉर्मुला असेल. मात्र, युती होणार हे नक्की,’ असं भाजपचे प्रदेशाध्यक्ष चंद्रकांत पाटील यांनी आज वृत्तवाहिन्यांशी बोलताना स्पष्ट केलं.
