इस्लामाबाद- दहशतवादी हाफिज सईदला पाकिस्तान कोर्टाने ११ वर्षांची शिक्षा सुनावली आहे. मुंबई २६/११ हल्ल्याचा मास्टरमाइंड असलेल्या हाफिजला दहशतवाद्यांना अर्थ पुरवठा केल्याप्रकरणी ही शिक्षा सुनावली आहे.
हाफिजच्या विरोधात दहशतवाद्यांना आर्थिक मदत, मनी लाँड्रिंग आणि बेकायदेशीरपणे ताबा मिळवणे आदी प्रकरणात २९ गुन्हे दाखल आहेत. मागील वर्षी लाहोरमधील दहशतवादविरोधी कोर्टाने बंदी असलेल्या जमात-उद-दवा या संघटनेचा प्रमुख हाफिज सईदविरोधातील दहशतवाद्यांना आर्थिक मदत केल्याच्या दोन प्रकरणांमध्ये निकाल राखून ठेवला होता. हे खटले दहशतवादविरोधी पथकाच्या लाहोर आणि गुजरावाला शाखेच्यावतीने दाखल करण्यात आले होते. या दोन्ही खटल्यात हाफिजला साडे पाच-साडे पाच वर्षाची शिक्षा सुनावण्यात आली होती.
पंजाब पोलिसांच्या दहशतवादविरोधी खात्याने हाफिज सईद आणि त्याच्या साथीदारांवर १७ जुलै रोजी २३ एफआयआर दाखल केले होते. दहशतवादाला निधी पुरवल्याच्या आरोपावरून पंजाब प्रांतातील वेगवेगळ्या शहरांमध्ये हे एफआयआर दाखल झाल्यानंतर हाफिजला अटक करण्यात आली होती. त्याला कोट लखपत तुरुंगात ठेवण्यात आले. लाहोर, गुजरनवाला आणि मुलतान या शहरांमध्ये हाफिजवर दावे दाखल करण्यात आले होते. हाफिजने अल-अंफल ट्रस्ट, दावतूल इर्शाद ट्रस्ट आणि मौझ बिन जबल ट्रस्ट अशी नावे असलेल्या संस्थांच्या माध्यमातून दहशतवादी कारवायांना आर्थिक पुरवठा केला होता. आंतरराष्ट्रीय समुदायांच्या दबावामुळे पाकिस्तानकडून हाफिजची चौकशी करण्यात आली होती.
