मुंबई- नाणारचं झालं तेच आरेचं होणार असं सांगत शिवसेना पक्षप्रमुख उद्धव ठाकरे यांनी मेट्रोच्या कारशेडसाठी आरेतील वृक्षतोडीला जोरदार विरोध केला आहे. त्यामुळे आगामी काळात आरे कारशेडवरून शिवसेना-भाजपा दरम्यान जुंपण्याची शक्यता वर्तवण्यात येत आहे.
उद्धव ठाकरे यांनी पत्रकार परिषद घेऊन मेट्रोच्या कारशेडसाठी आरेतील वृक्षतोडीला जाहीरपणे विरोध केला आहे. नाणार प्रकल्पाचाही असाच आग्रह धरण्यात आला होता. त्याचं काय झालं तुम्हाला माहीत आहे. जे नाणारचं झालं, तेच आरेचं होणार, असं सांगत उद्धव ठाकरे यांनी आरेतील वृक्षतोडीला विरोध केला.
काश्मीरप्रमाणंच राम मंदिराबाबत निर्णय घ्या-राम मंदिर हा आमच्या श्रद्धेचा आणि अस्मितेचा प्रश्न आहे. हा प्रश्न आम्ही सोडणार नाही. अयोध्येत राम मंदिरासाठी पहिली वीट लावण्याचं कामही आम्हीच करू, असं सांगताना आता हा प्रश्न अधिक काळ रेंगाळत ठेवता कामा नये. 1990 पासून हा प्रश्न प्रलंबित आहे. किती काळ थांबायचं? राम मंदिरासाठी आता थांबायला वेळ नाही. न्याय देवतेनं लवकरात लवकर निर्णय द्यावा. निर्णय यायला उशीर लागत असेल तर केंद्र सरकारने विशेष कायदा तयार करावा. काश्मीर प्रश्नासाठी जसे धाडसी पाऊल उचलले. तसेच राम मंदिरासाठी धाडसी पाऊल उचलावं, अशी मागणी उद्धव यांनी केली.
उदयनराजेंचा अपमान नाही
यावेळी त्यांनी उदयनराजे यांच्या भाजप प्रवेशावरही भाष्य केलं. उदयनराजेंचा अपमान करण्याचा आमचा हेतू नव्हता. त्यांच्याकडून काही गोष्टींची अपेक्षा आहे. आपल्या माणसांकडून या अपेक्षा नाही करायच्या तर कोणाकडून करायच्या? असा सवालही त्यांनी केला.
मुलाखती सुरू-दरम्यान, उद्धव ठाकरे यांनी शिवसेनेनेही विधानसभा निवडणुकीसाठी इच्छुकांच्या मुलाखती घ्यायला सुरुवात केल्याचं स्पष्ट केलं. कोणत्या जागांसाठी या मुलाखती आहेत, हे आताच सांगण्यात येणार नसल्याचं सांगून शिवसेना एकप्रकारे स्वबळावर लढण्याची तयारी करत असल्याचे संकेतही त्यांनी यावेळी दिले.
